Daha çox investor cəlb etmək istəyən OpenAI strukturunu dəyişməyə məcbur olur, çünki hazırda şirkətin rəhbərliyində qeyri-kommersiya qurumu dayanır. Bu, investorlar üçün qeyri-müəyyənlik yaradır, buna görə də OpenAI strukturunu daha klassik modelə yaxınlaşdırmağa çalışır. Bununla yanaşı, şirkət özünü potensial düşmənçiliyə əsaslanan satınalmalardan qorumaq niyyətindədir. Reuters-in Financial Times-a istinadən vermiş olduğu məlumata görə, yeni təşkilati struktur daha çox kommersiya yönümlü olacaq və investorlar qarşısında məsuliyyəti artıracaq. Eyni zamanda, OpenAI-nin idarə heyətinə veto hüququ veriləcək, belə ki, arzuolunmaz satınalma riski yaranarsa, bu hüquqdan istifadə edilə biləcək.
Görünən odur ki, OpenAI bu addımları Elon Musk-ın şirkəti 97.4 milyard dollara almaq cəhdindən sonra atmağa məcbur olub. Şirkətin idarə heyəti bu təklifi rədd etdi. Lakin şirkət kommersiya modeli ilə fəaliyyət göstərməyə keçərsə, idarəetmə strukturunda belə müdafiə mexanizmləri olmayacaq. Xüsusi səsvermə səlahiyyətlərinə malik olan idarə heyəti strateji qərarlar zamanı OpenAI-nin Microsoft və SoftBank kimi böyük səhmdarların təzyiqindən qorunmasına kömək edə bilər.
İdarə heyəti tərəfindən hazırlanmaqda olan qoruma mexanizmi OpenAI-nin həmtəsisçilərindən biri və hazırkı baş direktoru Sam Altman ilə birgə müzakirə olunur. Elon Musk bir neçə il əvvəl OpenAI-dən ayrılıb və o vaxtdan bəri şirkətin rəhbərliyini quruculuq missiyasından uzaqlaşmaqda ittiham edir. Musk, OpenAI-ni 97.4 milyard dollara almaq cəhdini şirkəti “xilas etmək” zərurəti ilə əsaslandırıb, lakin onun süni zəka sahəsindəki kommersiya marağını inkar etmək çətindir. 2023-cü ildə o, xAI adlı öz süni zəka startapını qurub. Bu şirkət hazırda aktiv şəkildə inkişaf və investorların marağını cəlb edir.